Ønskjer tips etter alvorleg valdshending

Politiet fekk melding om hendinga like før kl. 20.30 søndag 30.03.25. Då politiet kom til staden vart ein mann i 60-åra funnen med skadar som framstod som alvorlege til svært alvorlege. Den skadde mannen vart sendt til Ålesund sjukehus. Status frå helse i dag 31.03.25 er at skadane er alvorlege, men mannen skal vere utanfor livsfare.

Etterforskar bakgrunnen

Politiadvokat Anders Skorpen-Trøen seier at politiet no etterforskar kva som er bakgrunnen for den alvorlege valdshendinga. Det er funne eit slagvåpen på staden som framstår som å ha tilknyting til hendinga.

Med det politiet veit per no, har det vore kontakt mellom den mistenkte og fornærma nokre dagar før hendinga. Det vert jobba både taktisk og teknisk, og i dag vert det blant anna gjort fleire avhøyr. Samstundes har politiet søkt etter den mistenkte mannen gjennom kvelden i går og gjennom natta. Så langt, utan funn.

– I tillegg til politipersonell har vi brukt drone, hund og helikopter for å leite etter den mistenkte mannen som rømte frå staden etter hendinga, seier politiadvokat Anders Skorpen-Trøen.

– Vi veit at mistenkte har god kjennskap til området og vi har grunn til å tru at han framleis er ute i terrenget. Det er tidleg i etterforskinga og vi jobbar utifrå fleire hypotesar, men vi håpar vidare etterretning og etterforsking vil gi oss svar på desse spørsmåla. Det er eit stort område å søke i, og derfor ønskjer vi også tips og informasjon frå publikum som har observasjonar eller informasjon til oss, seier politiadvokat Skorpen-Trøen.

Kontakt politiet for observasjonar eller tips

Den mistenkte mannen har tilknyting til området. Då han forsvann var han kledd i mørk bukse og jakke, og ein kvit hettegensar/jakke. Han har slank kroppsbygnad, skjegg og raudt hår. Han er i 30-åra og snakkar norsk.

– Har nokon sett noko i terrenget eller ser noko mistenkeleg, ber vi om at ein ringer direkte til politiet på tlf. 02800 eller sender inn tips via tips-portalen vår på politiet.no.

Vi har ingen haldepunkt for at han skal vere farleg for andre, men kan ikkje utelukke det. Derfor oppmodar vi om at innbyggarar som har informasjon, ringer politiet direkte og ikkje tek kontakt med vedkomande, avsluttar Anders Skorpen-Trøen

Presseførespurnader:

Ta kontakt med stab for kommunikasjon, tlf. 990 94 670 eller på e-post:
kommunikasjon.moreogromsdal@politiet.no