Ønskjer tips i Sula-sakene frå 2015

Det var mellom onsdag kveld 15. juli til torsdag morgon 16. juni 2015 at ei eldre kvinne vart overfalt og valdteken i heimen sin i Mauseidvåg. Nokre veker etter, søndag 23. august 2015 om lag kl. 04.30, vart ytterlegare ei eldre kvinne overfalt og forsøkt valdteken i sin eigen heim, også i Mauseidvåg.

– Politidistriktet har gjennom desse åra hatt dialog med seksjon for kalde saker (Cold case) i Kripos og vi ønskjer igjen å ta ei ny runde på om nokon kan ha tips som kan bidra til at sakene vert oppklara, seier politiadvokat Yngve Skovly i Møre og Romsdal politidistrikt.

Sjølv om åra har gått, har vi fått tips i sakene, og politiet håpar framleis at det kan vere nokon der ute som sit på informasjon som dei ikkje har vore i kontakt med politiet om. Seksuelle overgrep kan vere vanskelege å snakke om.

– Er du usikker på om det er informasjon som er relevant, la politiet vurdere det, er den klare oppmodinga frå politiadvokat Skovly.

Politiet har tidlegare fått stadfesta at det er same DNA-profil i begge sakene, og dermed same gjerningsmann.

Det har tidlegare blitt gjennomført ei omfattande DNA-screening for å finne ut av kven som har utført ugjerningane. Dette arbeidet er nå gjenoppteke. Dei som no blir kontakta av politiet med spørsmål om å avgi DNA-prøve har ikkje mistanke retta mot seg. Via denne elimineringsprosessen håper politiet å kunne oppklare sakene.

Vi ønskjer fortrinnsvis tips via tipsportalen på politiet.no:

https://tips.politiet.no/app/generell/?locationId=0194649a-175c-4815-c2b0-3f6a0e368cb6

Du kan også ta kontakt på tlf. 02800 dersom du heller ønskjer å melde inn tips via telefon.