Politiet går ut med foto av sikta

Den sikta mannen rømte frå staden etter valdshendinga, og har god kjennskap til området. Politiet har mottatt fleire tips som blir følgt opp fortløpande. Politiet mistenker at mannen oppheld seg i nærmiljøet i Elnesvågen.

– Vi deler bilde av den sikta i håp om at det skal gi oss fleire tips som kan vere nyttige i den vidare etterforskinga og som kan føre til lokalisering av mannen. Om nokon har observert den sikta, eller sett noko mistenkeleg, ber vi om at ein ringer direkte til politiet på telefon 02800, eller sender inn tips via tips-portalen vår på politiet.no, seier politiadvokat Anders Skorpen-Trøen.

Kontakt politiet ved observasjonar

Den sikta mannen var kledd i mørk bukse og jakke, og ein kvit hettegensar/jakke når han rømte frå staden. Han har slank kroppsbygnad, skjegg og langt, raudt hår. Han er i 30-åra og snakkar norsk.

– Vi har ingen haldepunkt for at mannen er farleg for andre, men kan ikkje utelukke det. Vi oppmodar derfor innbyggjarar som har informasjon om å ringe politiet direkte og ikkje ta kontakt med vedkomande, seier Anders Skorpen-Trøen.