Har pågripe éin person i Danmark etter grovt bedrageri

Politiet i Møre og Romsdal har sidan februar etterforska saka der ei kvinne frå Romsdal vart lurt til å bli med til Tyrkia og svindla for eit millionbeløp. Møre og Romsdal politidistrikt har gjennom Kripos samarbeidd tett med internasjonale politistyresmakter (Interpol og Europol). I tillegg samarbeider politidistriktet med både politi i Danmark og Tyrkia.

– Gjennom ei omfattande etterforsking har vi klart å identifisere ein av gjerningspersonane. Det er ei dansk kvinne i 50-åra som no er pågripen i Danmark og sikta for grovt bedrageri etter straffelova § 372, fortel politiadvokat Anders Skorpen-Trøen.

Det er for tidleg å gå inn på detaljar om kva rolla til kvinna har vore i denne saka, men politiet mistenker at det er den pågripne, danske kvinna som har oppsøkt den fornærma kvinna i Romsdal i hennar heim.

– Vi håpar at den vidare etterforskinga vil gi oss meir detaljar rundt hennar rolle i saka. Vi kan ikkje utelukke at det fleire involverte, då mykje tyder på at den danske kvinna ikkje har opptredd åleine. Vi kan heller ikkje gi meir detaljar no sidan det er ei pågåande etterforsking. Dette må vi kome tilbake til på eit seinare tidspunkt, legg politiadvokat Skorpen-Trøen til.

Likevel understrekar han at det er nettopp den omfattande og detaljerte etterforskinga som har ført til gjennombrot i saka.

– Vi har gått igjennom omfattande mengder tekniske spor, og den samla informasjonen har gjort at vi kunne peike ut den mistenkte kvinna som no er pågripe i Danmark, avsluttar Anders Skorpen-Trøen som påpeikar at etterforskinga held vidare fram.

Presseførespurnader:

Ta kontakt med stab for kommunikasjon, tlf. 990 94 670 eller på e-post:
kommunikasjon.moreogromsdal@politiet.no