Politiet si innbyggjarundersøking for 2024

Det er ein signifikant framgang i andelen som seier politiet behandlar alle rettferdig og upartisk - og med respekt - uavhengig av kven dei er, og at politiet forklarer sine avgjerder og handlingar.

– Det er gledeleg at den satsinga vi har hatt på dette området ser ut til å ha ein effekt. Det er viktig at innbyggjarane opplever at våre tilsette møter dei med respekt og ein naudsynt openheit, seier politidirektør Håkon Skulstad.

Styrka inntrykk, men nedgang i tillit

Tillit er avgjerande for at politiet skal løyse samfunnsoppdraget. Når vi dykkar ned i dataene undersøkinga gir oss, ser vi at tilliten blant dei som har blitt utsett for minst éi negativ hending har sokke med tre prosentpoeng. Og andelen av befolkninga som har blitt utsett for minst ei hending har auka med to prosentpoeng. Medan tilliten er stabil blant dei som ikkje har blitt utsett for noko siste året.

– Å oppretthalde og styrke tilliten er viktig. Vi tek nedgangen på alvor og kjem til å undersøkje nærare samanhengen mellom å bli utsett for negative hendingar og lågare tillit, seier Skulstad.

Synkande tryggleikskjensle

Politidirektøren ønskjer å trekkje fram spesielt eitt viktig funn i årets undersøking. Og det er at tryggleikskjensla i sentrum av dei mest sentrale kommunane søkk. Denne trenden har vi sett dei siste to åra.

– Ein av dei viktigaste tinga for meg som ny politidirektør er tryggleik. Tryggleik for innbyggjarane og tryggleik for dei som jobbar i politiet. Difor bekymrar det meg at undersøkinga viser at berre 56 prosent seier dei er trygge åleine på kveldstid i sentrum av dei mest sentrale kommunane - og berre under halvparten av kvinnene seier dei føler seg trygge, seier han.

Politidirektøren meiner at desse funna bør bekymre fleire enn politiet.

– Vi må difor jobbe saman med kommunane og andre samarbeidspartnarar for å førebyggje negative hendingar og sørgje for at innbyggjarane føler seg trygge der dei bur, avsluttar Skulstad.

Her finn du rapporten med dei nasjonale resultata og resultat per politidistrikt.